Библия, г҃ маккавей́скаѧ, Глава 3. is available here: https://www.bible.promo/chapters.php?id=11225&pid=71&tid=2&bid=85
Holy Bible project logo icon
FREE OFF-line Bible for Android Get Bible on Google Play QR Code Android Bible

Holy Bible
for Android

is a powerful Bible Reader which has possibility to download different versions of Bible to your Android device.

Bible Verses
for Android

Bible verses includes the best bible quotes in more than 35 languages

Pear Bible KJV
for Android

is an amazing mobile version of King James Bible that will help you to read this excellent book in any place you want.

Pear Bible BBE
for Android

is an amazing mobile version of Bible in Basic English that will help you to read this excellent book in any place you want.

Pear Bible ASV
for Android

is an amazing mobile version of American Standard Version Bible that will help you to read this excellent book in any place you want.

BIBLE VERSIONS / Библия / Новый Завет / г҃ маккавей́скаѧ

Библия - Церковнославянская

в҃ маккавей́скаѧ г҃ маккавей́скаѧ Варѹ́хъ

Глава 1 2 3 4 5 6 7

1 Сїѧ҄ ѹ҆вѣ́давъ нечести́вый въ толи́ко разгнѣ́ванїе прїи́де, ѩ҆́кѡ не то́кмѡ на сѹ́щихъ во а҆леѯандрі́и разгнѣ́васѧ, но и҆ сѹ́щымъ во странѣ̀ тѧ́жцѣ сопроти́висѧ и҆ повелѣ̀ тща́телнѣ всѣ́хъ собра́ти въ кѹ́пѹ и҆ лютѣ́йшею сме́ртїю живота̀ лиши́ти.

2 Си҄мъ же ѹ҆стро́єнымъ бы́вшымъ, вѣ́сть ѕла́ѧ происхожда́ше на ро́дъ (ї҆ѹде́йскїй), человѣ́кѡмъ согласѹ́ющымъ на ѕлотворе́нїе, є҆гда̀ вина̀ даде́сѧ ко ѹ҆ставле́нїю, а҆́ки бы и҆̀мъ возбранѧ́ли ѿ зако́нѡвъ.

3 Но ї҆ѹде́є бѣ́хѹ сохранѧ́юще ко царє́мъ ѹ҆́бѡ неразвра́тное послѹша́нїе и҆ вѣ́рность, чествѹ́юще же бг҃а и҆ зако́на є҆гѡ̀ держа́шесѧ, ѿлѹче́нїе творѧ́хѹ въ нѣ́кїихъ и҆ ѿмѣ҄ны: є҆ѧ́же ра́ди вины̀ нѣ҄кїимъ ненави́дими ѩ҆влѧ́хѹсѧ: пра́ведныхъ же благотворе́нїемъ ѹ҆краша́юще сожи́телство, всѣ҄мъ человѣ́кѡмъ благопрїѧ́тни сотвори́шасѧ.

4 Тѣ́мже ѹ҆̀бо ѡ҆ ро́дѣ во всѣ́хъ сла́вимое благотворе́нїе и҆ноплемє́нницы ни во что̀ вмѣнѧ́хѹ, разли́чїе же въ поклоне́нїихъ и҆ бра́шнахъ разглаша́хѹ, глаго́люще, ѩ҆́кѡ сі́и человѣ́цы нижѐ царю̀, нижѐ во́ємъ согла́сни сѹ́ть, но вражде́бни сѹ́ть и҆ вельмѝ нѣ́какѡ дѣлѡ́мъ проти́вни: и҆ нестерпи́мымъ ѡ҆гласи́ша и҆̀хъ хѹле́нїемъ.

5 Є҆́ллини же сѹ́щїи во гра́дѣ ни чи́мъ ѡ҆би́дими ѿ ни́хъ, ви́дѧще смѧте́нїе неча́ѧнное на ни́хъ и҆ собра҄нїѧ внеза́пнѡ быва҄ющаѧ, помощѝ ѹ҆́бѡ не мого́ша: мѹчи́телское бо бѧ́ше повелѣ́нїе.

6 Ѹ҆тѣша́хѹ же и҆ негодова́хѹ и҆ минѹ́ти си҄мъ вско́рѣ непщева́хѹ, и҆́бо не бѹ́детъ та́кѡ презрѣ́но толи́кое мно́жество ничто́же согрѣши́вшее.

7 И҆ ѹ҆жѐ нѣ́цыи сосѣ́ди и҆ дрѹ́зи и҆ сокѹпе́чствѹющїи, та́йнѡ нѣ́кїихъ призва́вше, вѣ́рность даѧ́хѹ помога́ти и҆ всѧ́кое ѹ҆се́рдїе твори́ти къ защище́нїю.

8 Ѻ҆́нъ же ѹ҆̀бо по настоѧ́щемѹ благоде́нствїю разгордѣва́ѧсѧ и҆ не зрѧ̀ вели́кагѡ бг҃а держа́вы, непщѹ́ѧ же вы́нѹ въ сицево́мъ пребыва́ти ѕлосовѣ́тїи, написа̀ на нѧ̀ посла́нїе сицево́е:

9 ца́рь птоломе́й фїлопа́тѡръ сѹ́щымъ во є҆гѵ́птѣ и҆ по мѣстѡ́мъ страти́гѡмъ и҆ во́инѡмъ ра́доватисѧ и҆ здра́вствовати: здра́встѹю же и҆ а҆́зъ са́мъ, и҆ ве́щы на́шѧ:

10 по бы́вшей на́мъ ра́ти во а҆сі́и, ю҆́же вѣ́сте и҆ вы̀, ѩ҆́же богѡ́въ неча́ѧннымъ споборе́нїемъ и҆ на́шею си́лою разѹ́мнѡ въ до́брый коне́цъ приведе́сѧ, сѹди́хомъ не нѹ́ждею ѻ҆рѹ́жїѧ, но кро́тостїю и҆ мно́гимъ человѣ́колюбїемъ благоѹстро́ити живѹ́щыѧ въ кїлисѷрі́и и҆ фїнїкі́и ѩ҆зы́ки и҆ благотвори́ти ра́достнѣ:

11 и҆ сѹ́щымъ во градѣ́хъ ка́пищємъ да́вше дохо́ды премнѡ́ги, прїидо́хомъ и҆ во ї҆ер҇ли́мъ, возше́дше почти́ти хра́мъ сѹемѹ́дренныхъ и҆ никогда́же престаю́щихъ ѿ безѹ́мїѧ:

12 ѻ҆ни́ же сло́вомъ ѹ҆́бѡ прїѧ́ша на́ше прише́ствїе, дѣ́ломъ же ле́стнѣ, возжелѣ́вшымъ на́мъ вни́ти во хра́мъ и҆́хъ и҆ лѣ́потными и҆ добрѣ́йшими да҄ры почти́ти, ті́и по дре́вней (свое́й) го́рдости возбрани́ша на́мъ вни́ти, немощнѣ́йшїи (сѹ́ще) на́шеѧ си́лы, за человѣколю́бїе, є҆́же и҆́мамы ко всѣ҄мъ человѣ́кѡмъ,

13 свое́ же ѕломы́слїе къ на́мъ ѩ҆вле́нно показа́вше, а҆́ки є҆ди́ни то́чїю ѿ ѩ҆зы҄къ царє́мъ и҆ и҆́хъ благодѣ́телємъ вы҄и не покарѧ́юще, ничто́же пра́ведно хо́щѹтъ носи́ти:

14 мы́ же си́хъ безѹ́мїе ѹ҆смотри́вше, и҆ съ побѣ́дою возврати́вшесѧ, и҆ во є҆гѵ́птѣ со всѣ́ми ѩ҆зы҄ки любочеловѣ́чнѣ срѣ́тившесѧ, ѩ҆́коже подоба́ше, сотвори́хомъ:

15 и҆ въ тѣ́хъ ко є҆диноплеме́нникѡмъ и҆́хъ непамѧтоѕло́бїе всѣ҄мъ сказѹ́юще, и҆ ра́ди споборе́нїѧ, и҆ ввѣ́рєнныѧ съ простото́ю и҆̀мъ и҆здре́вле безчи́слєнныѧ ве́щы дерзнѹ́вше премѣни́ти, восхотѣ́хомъ и҆ гражда́нства а҆леѯандрі́йскагѡ сподо́бити и҆̀хъ и҆ прича́стники всегда̀ жерцє́мъ поста́вити:

16 ѻ҆ни́ же въ проти́вность прїе́млюще, и҆ приро́днымъ ѕлонра́вїемъ до́брое ѿри́нѹвше, и҆ пр҇нѡ въ ѕло́е ѹ҆клонѧ́ющесѧ, не то́кмѡ ѿри́нѹша честно́е гражда́нство, но и҆ гнѹша́ютсѧ сло́вомъ и҆ дѣ́ломъ, молча́нїемъ тѣ́хъ, и҆̀же немно́гїи ѿ ни́хъ къ на́мъ неле́стнѣ доброжела́тельни сѹ́ть, по всѧ́къ ча́съ ча́юще, ѩ҆́кѡ мы̀ вско́рѣ нестро́йнымъ житїе́мъ низврати́мъ и҆справлє́нїѧ.

17 Тѣ́мже и҆ показа́ньми до́брѣ ѹ҆вѣща́вшесѧ, ѩ҆́кѡ сі́и по всѧ́комѹ ѡ҆́бразѹ ѕломы́слѧтъ на́мъ, и҆ мы̀ проразѹмѣва́юще, да не когда̀ внеза́пнѹ пото́мъ мѧте́жѹ наше́дшѹ на ны̀, си́хъ нечести́выхъ созадѝ преда́телей и҆ ва́рварѡвъ воз̾имѣ́емъ сѹпоста́тѡвъ,

18 повелѣ́хомъ ѹ҆̀бо, є҆гда̀ прїи́детъ къ ва́мъ посла́нїе сїѐ, вско́рѣ во є҆ди́нъ ча́съ вышепи́санныхъ собра́вше съ жена́ми и҆ ча҄ды, съ доса́дою и҆ ѡ҆ѕлобле́нїемъ посла́ти къ на́мъ ѹ҆́зами желѣ́зными ѿвсю́дѹ ѡ҆кова́нныхъ, на лю́тое и҆ ѕлосла́вное подоба́ющее ѕломы́слѧщымъ ѹ҆бїе́нїе:

19 по ѹ҆мѹче́нїи бо си́хъ ѹ҆пова́емъ, ѩ҆́кѡ въ про́чее вре́мѧ соверше́ннѡ на́мъ ве́щы во благостоѧ́нїи и҆ въ предо́брѣмъ состоѧ́нїи ѹ҆стро́ѧтсѧ.

20 А҆́ще же кто̀ скры́етъ коего́ либо ї҆ѹде́анина, ѿ ста́ра да́же до младе́нца и҆ да́же до ссѹ́щихъ, прелютѣ́йшими мѹ́ками ѹ҆мѹ́ченъ бѹ́детъ со всѣ́мъ до́момъ:

21 а҆́ще же кто̀ возвѣсти́тъ, се́й прїи́метъ и҆мѣ́нїе подпа́дшагѡ ка́зни, є҆ще́ же и҆ ѿ ца́рскагѡ сребра̀ дра́хмъ двѣ̀ ты́сѧщы, и҆ свобо́дѹ полѹчи́тъ, и҆ ѹ҆вѣнча́етсѧ:

22 всѧ́ко же мѣ́сто, и҆дѣ́же а҆́ще ѩ҆́тъ бѹ́детъ весьма̀ кры́ющьсѧ ї҆ѹде́анинъ, пѹ́сто и҆ ѻ҆гне́мъ сожже́но да бѹ́детъ, и҆ всѧ́комѹ сме́ртномѹ є҆стествѹ̀ по всемѹ̀ неключи́мо да бѹ́детъ въ вѣ́чное вре́мѧ. И҆ ѹ҆́бѡ посла́нїѧ ѡ҆́бразъ си́це напи́санъ бы́сть.

<< ← Prev Top Next → >>