Библия, а҃ маккавей́скаѧ, Глава 10. is available here: https://www.bible.promo/chapters.php?id=11201&pid=69&tid=2&bid=85
Holy Bible project logo icon
FREE OFF-line Bible for Android Get Bible on Google Play QR Code Android Bible

Holy Bible
for Android

is a powerful Bible Reader which has possibility to download different versions of Bible to your Android device.

Bible Verses
for Android

Bible verses includes the best bible quotes in more than 35 languages

Pear Bible KJV
for Android

is an amazing mobile version of King James Bible that will help you to read this excellent book in any place you want.

Pear Bible BBE
for Android

is an amazing mobile version of Bible in Basic English that will help you to read this excellent book in any place you want.

Pear Bible ASV
for Android

is an amazing mobile version of American Standard Version Bible that will help you to read this excellent book in any place you want.

BIBLE VERSIONS / Библия / Новый Завет / а҃ маккавей́скаѧ

Библия - Церковнославянская

А҆пока́лѷѱїсъ а҃ маккавей́скаѧ в҃ маккавей́скаѧ

Глава 1 2 3 4 5 6 7 8 9 10 11 12 13 14 15 16

1 И҆ въ лѣ́то сто̀ шестьдесѧ́тое взы́де а҆леѯа́ндръ сы́нъ а҆нтїо́ховъ є҆пїфа́нъ и҆ ѡ҆держа̀ птолемаі́дѹ: и҆ прїѧ́ша є҆го̀, и҆ ца́рствова та́мѡ.

2 И҆ слы́ша дими́трїй ца́рь, и҆ собра̀ во́євъ мно́гѡ ѕѣлѡ̀, и҆ и҆зы́де проти́вѹ є҆мѹ̀ на бра́нь.

3 И҆ посла̀ дими́трїй ко ї҆ѡнаѳа́нѹ є҆пїстѡ́лїи словесы̀ ми́рными, велича́ѧ є҆го̀.

4 Рече́ бо: предвари́мъ сотвори́ти ми́ръ съ ни́мъ, пре́жде не́же сотвори́тъ со а҆леѯа́ндромъ проти́вѹ на́съ:

5 воспомѧ́нетъ бо всѧ҄ ѕла҄ѧ, ѩ҆̀же сотвори́хомъ на него̀ и҆ на бра́тїю є҆гѡ̀ и҆ на ѩ҆зы́къ є҆гѡ̀.

6 И҆ дадѐ є҆мѹ̀ вла́сть собира́ти во́ины и҆ ѹ҆готовлѧ́ти ѻ҆рѹ҄жїѧ, и҆ бы́ти є҆мѹ̀ дрѹ́гомъ є҆гѡ̀, и҆ зало́гъ, и҆́же бѣ̀ въ краегра́дїи, повелѣ̀ ѿда́ти є҆мѹ̀.

7 И҆ прїи́де ї҆ѡнаѳа́нъ во ї҆ер҇ли́мъ и҆ прочтѐ є҆пїстѡ́лїи во ѹ҆слы́шанїе всѣ҄мъ лю́демъ и҆ и҆̀же ѿ краегра́дїѧ.

8 И҆ ѹ҆страши́шасѧ стра́хомъ ве́лїимъ, є҆гда̀ ѹ҆слы́шаша, ѩ҆́кѡ дадѐ є҆мѹ̀ ца́рь вла́сть собира́ти во́ины.

9 И҆ преда́ша и҆̀же ѿ краегра́дїѧ ї҆ѡнаѳа́нѹ зало́гъ, и҆ ѿдадѐ и҆̀хъ роди́телємъ и҆́хъ.

10 И҆ ѡ҆бита̀ ї҆ѡнаѳа́нъ во ї҆ер҇ли́мѣ, и҆ нача̀ созида́ти и҆ ѡ҆бновлѧ́ти гра́дъ,

11 и҆ речѐ ко творѧ́щымъ дѣла̀ созида́ти стѣ́ны и҆ го́рѹ сїѡ́нъ ѡ҆́крестъ ѿ ка́менїй четвероѹго́лныхъ ко ѹ҆твержде́нїю, и҆ сотвори́ша си́це.

12 И҆ побѣго́ша и҆ноплемє́нницы, и҆̀же бѧ́хѹ въ тверды́нехъ, ѩ҆̀же созда̀ вакхі́дъ:

13 и҆ ѡ҆ста́ви кі́йждо мѣ́сто своѐ и҆ ѿи́де въ зе́млю свою̀.

14 Ѻ҆ба́че въ веѳсѹ́рѣ ѡ҆ста́шасѧ нѣ́цыи ѿ ѡ҆ста́вльшихъ зако́нъ и҆ за́пѡвѣди (бж҃їѧ): бѣ́ бо и҆̀мъ ѹ҆бѣ́жище.

15 И҆ слы́ша а҆леѯа́ндръ ца́рь ѡ҆бѣща҄нїѧ, є҆ли҄ка посла̀ дими́трїй ї҆ѡнаѳа́нѹ, и҆ повѣ́даша є҆мѹ̀ бра҄ни и҆ мѹ́жєства, ѩ҆̀же сотворѝ то́й и҆ бра́тїѧ є҆гѡ̀, и҆ трѹды̀, ѩ҆̀же и҆мѣ́хѹ.

16 И҆ речѐ: є҆да̀ ѡ҆брѧ́щемъ ко́его мѹ́жа такова̀; и҆ нн҃ѣ сотвори́мъ є҆го̀ въ дрѹ́га и҆ спобо́рника на́шего.

17 И҆ написа̀ є҆пїстѡ́лїи и҆ посла̀ є҆мѹ̀ по словесє́мъ си҄мъ, глаго́лѧ:

18 ца́рь а҆леѯа́ндръ бра́тѹ ї҆ѡнаѳа́нѹ ра́доватисѧ:

19 слы́шахомъ ѡ҆ тебѣ̀, ѩ҆́кѡ мѹ́жъ си́ленъ є҆сѝ крѣ́постїю и҆ ѹ҆го́денъ є҆сѝ бы́ти на́мъ дрѹ́гъ:

20 и҆ нн҃ѣ поста́вихомъ тѧ̀ дне́сь а҆рхїере́а ѩ҆зы́ка твоегѡ̀, и҆ є҆́же дрѹ́гомъ царе́вымъ нарица́тисѧ (и҆ посла̀ є҆мѹ̀ порфѵ́рѹ и҆ вѣне́цъ зла́тъ), и҆ мѹ́дрствовати та҄ѧжде съ на́ми и҆ снабдѣва́ти дрѹ́жбѹ къ на́мъ.

21 И҆ ѡ҆блече́сѧ ї҆ѡнаѳа́нъ во свѧтѹ́ю ри́зѹ седма́гѡ мц҇а лѣ́та сто̀ шестьдесѧ́тагѡ, въ де́нь пра́здника сѣнопотче́нїѧ, и҆ собра̀ си҄лы и҆ ѹ҆гото́ва ѻ҆рѹ҄жїѧ мнѡ́га.

22 И҆ слы́ша дими́трїй словеса̀ сїѧ҄, и҆ ѡ҆печа́лисѧ ѕѣлѡ̀, и҆ речѐ:

23 что̀ сїѐ сотвори́хомъ, ѩ҆́кѡ предварѝ на́съ а҆леѯа́ндръ соста́вити дрѹ́жбѹ со ї҆ѹдє́и во ѹ҆твержде́нїе;

24 напишѹ̀ и҆ а҆́зъ и҆̀мъ словеса̀ проси́тєлнаѧ и҆ возвышє́нїѧ и҆ да́ры, ѩ҆́кѡ да бѹ́дѹтъ со мно́ю въ по́мощь.

25 И҆ написа̀ и҆̀мъ по словесє́мъ си҄мъ: ца́рь дими́трїй ѩ҆зы́кѹ ї҆ѹде́йскомѹ ра́доватисѧ:

26 поне́же сохрани́сте завѣ́ты къ на́мъ и҆ пребыва́сте въ дрѹ́жбѣ на́шей и҆ не пристѹпи́сте ко врагѡ́мъ на́шымъ, слы́шахомъ и҆ ра́довахомсѧ:

27 и҆ нн҃ѣ пребыва́йте є҆щѐ сохрани́ти къ на́мъ вѣ́рѹ, и҆ воздади́мъ ва́мъ блага҄ѧ, и҆́хже ра́ди творитѐ съ на́ми,

28 и҆ ѡ҆ста́вимъ ва́мъ да҄ни мнѡ́ги, и҆ дади́мъ ва́мъ да́ры:

29 и҆ нн҃ѣ свобо́дныхъ творю̀ ва́съ и҆ ѡ҆ставлѧ́ю всѣ҄мъ ї҆ѹде́ѡмъ да҄ни и҆ цѣ́нѹ ѿ со́ли и҆ ѿ вѣнцє́въ:

30 и҆ є҆́же вмѣ́стѡ трети́ны сѣ́мене и҆ вмѣ́стѡ полови́ны плода̀ древе́снагѡ надлежа́щагѡ мѝ взѧ́ти, ѡ҆ставлѧ́ю ѿ дне́сь и҆ пото́мъ, є҆́же не взима́ти ѿ землѝ ї҆ѹ́дины и҆ ѿ трїе́хъ стра́нъ прилежа́щихъ є҆́й, ѿ самарі́и и҆ галїле́и, и҆ ѿ дне́шнѧгѡ днѐ и҆ въ вѣ́чное вре́мѧ:

31 и҆ ї҆ер҇ли́мъ да бѹ́детъ ст҃ъ и҆ свобо́денъ со предѣ҄лы свои́ми, и҆ десѧти҄ны и҆ да҄ни:

32 ѡ҆ставлѧ́ю и҆ вла́сть краегра́дїѧ є҆́же во ї҆ер҇ли́мѣ, и҆ даю̀ а҆рхїере́ю, да поста́витъ въ не́мъ мѹ́жы, и҆̀хже а҆́ще и҆збере́тъ са́мъ, храни́ти є҆го̀:

33 и҆ всѧ́кѹ дѹ́шѹ ї҆ѹде́йскѹю, ѩ҆́же плѣне́на є҆́сть ѿ землѝ ї҆ѹ́дины, во все́мъ ца́рствѣ мое́мъ ѡ҆ставлѧ́ю свобо́днѹ тѹ́не, и҆ всѝ да ѡ҆ста́вѧтсѧ ѿ да́ней и҆ скотѡ́въ свои́хъ:

34 и҆ всѝ пра́здницы и҆ сѹббѡ҄ты и҆ новомч҇їѧ и҆ дні́е вчине́ннїи, и҆ трѝ дни҄ пре́жде пра́здника и҆ трѝ дни҄ по пра́здницѣ, да бѹ́дѹтъ всѝ дні́е свобо́ды и҆ ѡ҆ставле́нїѧ всѣ҄мъ ї҆ѹде́ѡмъсѹ́щымъ во ца́рствїи мое́мъ:

35 и҆ никто̀ и҆мѣ́ти бѹ́детъ вла́сти дѣ́лати и҆ стѹжа́ти комѹ̀ ѿ ни́хъ ѡ҆ всѧ́цѣй ве́щи:

36 и҆ да напи́шѹтсѧ ѿ ї҆ѹдє́й въ во́ины ца҄рскїѧ до три́десѧти ты́сѧщъ мѹже́й, и҆ да дадѹ́тсѧ и҆̀мъ ѡ҆бро́цы, ѩ҆́коже подоба́етъ всѣ҄мъ во́ємъ ца҄рскимъ:

37 и҆ да поста́вѧтсѧ ѿ ни́хъ въ тверды́нехъ ца́рскихъ ве́лїихъ, и҆ ѿ си́хъ поста́вѧтсѧ на потрє́бы ца́рства сѹ́щыѧ въ вѣ́рность: и҆ сѹ́щїи над̾ ни́ми и҆ нача҄лницы да бѹ́дѹтъ ѿ ни́хъ, и҆ да хо́дѧтъ въ зако́нѣхъ свои́хъ, ѩ҆́коже повелѣ̀ ца́рь въ землѝ ї҆ѹ́динѣ:

38 и҆ трѝ предѣ́лы, прилежа́щїи ї҆ѹде́и ѿ страны̀ самарі́йскїѧ, да приложа́тсѧ ко ї҆ѹде́и, да вмѣнѧ́тсѧ бы́ти под̾ є҆ди́нымъ, є҆́же не послѹ́шати и҆ны́ѧ вла́сти, но то́кмѡ а҆рхїере́а:

39 птолемаі́дѹ и҆ предѣ́лы є҆ѧ̀ да́хъ въ да́ръ ст҃ы҄мъ, сѹ́щымъ во ї҆ер҇ли́мѣ, на прили́чное и҆ждиве́нїе ст҃ы҄мъ,

40 и҆ а҆́зъ да́мъ на ко́еждо лѣ́то пѧтьна́десѧть ты́сѧщъ сї҄кль сребра̀ ѿ сокро́вищъ ца́рскихъ ѿ мѣ́стъ прилежа́щихъ:

41 и҆ всѧ́кое и҆зли́шнее, є҆́же не возда́ша ѿ потре́бъ, ѩ҆́коже въ пе́рвыхъ лѣ́тѣхъ, ѿнн҃ѣ дадѹ́тъ въ дѣла̀ хра́мѹ:

42 и҆ свы́ше си́хъ пѧ́ть ты́сѧщъ сі́клей сребра̀, и҆̀хже взима́хѹ ѿ потре́бъ свѧти́лища, ѩ҆́коже въ пре́жнихъ лѣ́тѣхъ ѿ собра́нїѧ на всѧ́кое лѣ́то, и҆ сїѧ҄ ѡ҆ставлѧ́ютсѧ, поне́же надлежа́тъ сїѧ҄ жерцє́мъ слѹжа́щымъ:

43 и҆ є҆ли́цы а҆́ще прибѣ́гнѹтъ къ це́ркви сѹ́щей во ї҆ер҇ли́мѣхъ и҆ во всѣ́хъ предѣ́лѣхъ є҆гѡ̀, ѡ҆долже́ни сѹ́ще ца́рскими и҆ всѧ́кою ве́щїю, да ѿрѣша́ютсѧ, и҆ всѧ҄ є҆ли҄ка сѹ́ть и҆̀мъ во ца́рствїи мое́мъ:

44 и҆ созида́ти и҆ ѡ҆бновлѧ́ти дѣла̀ ст҃ы́хъ, и҆ и҆ждиве́нїе да́стсѧ ѿ сокро́вища ца́рскагѡ:

45 и҆ є҆́же созида́ти стѣ́ны ї҆ер҇ли́ма и҆ ѹ҆тверди́ти ѡ҆́крестъ, и҆ и҆ждиве́нїе да́стсѧ ѿ собра́нїѧ ца́рска, и҆ є҆́же созда́ти стѣ́ны во ї҆ѹде́и.

46 Е҆гда́ же ѹ҆слы́ша ї҆ѡнаѳа́нъ и҆ лю́дїе словеса̀ сїѧ҄, не вѣ́роваша и҆̀мъ, нижѐ прїѧ́ша, ѩ҆́кѡ помѧнѹ́ша ѕло́бѹ ве́лїю, ю҆́же сотворѝ во ї҆и҃ли, и҆ ѡ҆скорбѝ и҆̀хъ ѕѣлѡ̀.

47 И҆ благоволи́ша ѡ҆ а҆леѯа́ндрѣ, ѩ҆́кѡ се́й бы́сть и҆̀мъ нача́лникъ слове́съ ми́рныхъ, и҆ споборѧ́хѹ є҆мѹ̀ во всѧ҄ дни҄.

48 И҆ собра̀ ца́рь а҆леѯа́ндръ си́лѹ ве́лїю и҆ ѡ҆полчи́сѧ проти́вѹ дими́трїа.

49 И҆ сотвори́ша бра́нь два̀ царѧ҄, и҆ побѣжѐ по́лкъ дими́трїевъ, и҆ гна̀ є҆го̀ а҆леѯа́ндръ и҆ ѹ҆крѣпи́сѧ на ни́хъ.

50 И҆ превозмо́же бра́нь ѕѣлѡ̀, до́ндеже за́йде со́лнце, и҆ падѐ дими́трїй въ де́нь ѡ҆́нъ.

51 И҆ посла̀ а҆леѯа́ндръ ко птоломе́ю царю̀ є҆гѵ́петскомѹ послы̀ по словесє́мъ си҄мъ, рекі́й:

52 поне́же возврати́хсѧ въ зе́млю ца́рства моегѡ̀, и҆ сѣдо́хъ на престо́лѣ ѻ҆тє́цъ мои́хъ, и҆ ѡ҆держа́хъ нача́лство, и҆ сокрѹши́хъ дими́трїа, и҆ воз̾ѡблада́хъ страно́ю на́шею,

53 и҆ соста́вихъ проти́вѹ є҆гѡ̀ ра́ть, и҆ сокрѹши́сѧ то́й и҆ ѡ҆полче́нїе є҆гѡ̀ ѿ на́съ, и҆ сѣдо́хомъ на престо́лѣ ца́рства є҆гѡ̀:

54 и҆ нн҃ѣ соста́вимъ междѹ̀ на́ми дрѹ́жбѹ, и҆ нн҃ѣ да́ждь мнѣ̀ дще́рь твою̀ въ женѹ̀, и҆ бѹ́дѹ зѧ́ть тво́й, и҆ да́мъ тебѣ̀ да́ры, и҆ є҆́й достѡ́йнаѧ тебє̀.

55 И҆ ѿвѣща̀ ца́рь птоломе́й глаго́лѧ: бла́гъ де́нь, въ ѻ҆́ньже возврати́лсѧ є҆сѝ въ зе́млю ѻ҆тє́цъ твои́хъ и҆ сѣ́лъ є҆сѝ на престо́лѣ ца́рства и҆́хъ:

56 и҆ нн҃ѣ сотворю̀ тѝ, ѩ҆̀же писа́лъ є҆сѝ: но срѧ́щисѧ во птолемаі́дѣ, ѩ҆́кѡ да ви́димъ дрѹ́гъ дрѹ́га, и҆ бѹ́деши мѝ зѧ́ть, ѩ҆́коже ре́клъ є҆сѝ.

57 И҆ и҆зы́де птоломе́й ѿ є҆гѵ́пта са́мъ и҆ клеопа́тра дщѝ є҆гѡ̀, и҆ внидо́ша во птолемаі́дѹ лѣ́та сто̀ шестьдесѧ́тъ втора́гѡ.

58 И҆ срѣ́те є҆го̀ а҆леѯа́ндръ ца́рь: и҆ дадѐ є҆мѹ̀ клеопа́трѹ дще́рь свою̀ и҆ сотворѝ бра́къ є҆ѧ̀ во птолемаі́дѣ, ѩ҆́коже ца́рїе во сла́вѣ вели́цѣй.

59 И҆ написа̀ а҆леѯа́ндръ ца́рь ї҆ѡнаѳа́нѹ прїитѝ во срѣ́тенїе є҆мѹ̀.

60 И҆ и҆́де со сла́вою во птолемаі́дѹ и҆ срѣ́те ѻ҆́ба царѧ҄: и҆ дадѐ и҆́ма сребро̀ и҆ зла́то и҆ дрѹгѡ́мъ и҆́хъ, и҆ да́ры мнѡ́ги, и҆ ѡ҆брѣ́те благода́ть пред̾ ни́ма.

61 И҆ собра́шасѧ на́нь мѹ́жїе гѹби́телє ѿ ї҆и҃лѧ, мѹ́жїе беззако́ннїи клевета́ти на́нь. и҆ не внѧ́тъ и҆̀мъ ца́рь.

62 И҆ повелѣ̀ ца́рь совлещѝ ї҆ѡнаѳа́на съ ри́зъ є҆гѡ̀ и҆ ѡ҆блещѝ є҆го̀ въ порфѵ́рѹ. и҆ сотвори́ша та́кѡ.

63 И҆ посадѝ є҆го̀ ца́рь съ собо́ю и҆ речѐ нача́лникѡмъ свои҄мъ: и҆зыди́те съ ни́мъ на средѹ̀ гра́да и҆ проповѣ́дите ни є҆ди́номѹ клевета́ти на́нь ни ѡ҆ є҆ди́нѣй ве́щи, и҆ ни є҆ди́нъ є҆мѹ̀ да стѹжи́тъ ѡ҆ всѧ́цѣмъ глаго́лѣ.

64 И҆ бы́сть є҆гда̀ ѹ҆ви́дѣша клеветницы̀ сла́вѹ є҆гѡ̀, ѩ҆́коже проповѣ́даша, и҆ ѡ҆блече́на є҆го̀ порфѵ́рою, и҆ бѣжа́ша всѝ.

65 И҆ просла́ви є҆го̀ ца́рь, и҆ написа̀ є҆го̀ въ пе́рвыхъ дрѹзѣ́хъ, и҆ поста́ви є҆го̀ воево́дѹ и҆ ѹ҆ча́стника нача́лства.

66 И҆ возврати́сѧ ї҆ѡнаѳа́нъ во ї҆ер҇ли́мъ съ ми́ромъ и҆ весе́лїемъ.

67 И҆ въ лѣ́то сто̀ шестьдесѧ́тъ пѧ́тое прїи́де дими́трїй сы́нъ дими́трїевъ ѿ кри́та въ зе́млю ѻ҆тє́цъ свои́хъ.

68 И҆ слы́ша а҆леѯа́ндръ ца́рь, и҆ ѡ҆печа́лисѧ ѕѣлѡ̀, и҆ возврати́сѧ во а҆нтїохі́ю.

69 И҆ поста́ви дими́трїй а҆поллѡ́нїа сѹ́щаго ѿ кїлїсѷрі́и: и҆ собра̀ си́лѹ ве́лїю, и҆ ѡ҆полчи́сѧ во ї҆амні́и, и҆ посла̀ ко ї҆ѡнаѳа́нѹ а҆рхїере́ю, глаго́лѧ:

70 ты́ ли є҆ди́нъ возно́сишисѧ на ны̀, а҆́зъ же бы́хъ въ посмѣ́хъ и҆ въ поноше́нїе тебє̀ ра́ди: и҆ чесѡ̀ ра́ди ты̀ вла́стелствѹеши над̾ на́ми въ гора́хъ;

71 нн҃ѣ ѹ҆̀бо, а҆́ще надѣ́ешисѧ въ си́лахъ твои́хъ, и҆зы́ди къ на́мъ на по́ле и҆ и҆скѹси́мсѧ тѹ̀ междѹ̀ собо́ю, ѩ҆́кѡ со мно́ю є҆́сть си́ла градѡ́въ:

72 вопросѝ и҆ наѹчи́сѧ, кто̀ є҆́смь; и҆ про́чїи помога́ющїи на́мъ, и҆ глаго́лютъ: нѣ́сть ва́мъ стоѧ́нїѧ ногѝ пред̾ лице́мъ на́шимъ, ѩ҆́кѡ два́щи въ бѣ́гъ ѡ҆брати́шасѧ ѻ҆тцы̀ твоѝ въ землѝ и҆́хъ:

73 и҆ нн҃ѣ не возмо́жеши стерпѣ́ти ко́нника и҆ си́лы таковы́ѧ въ по́ли, и҆дѣ́же нѣ́сть ка́мене, ни стѣны̀, ни мѣ́ста къ бѣжа́нїю.

74 Е҆гда́ же ѹ҆слы́ша ї҆ѡнаѳа́нъ словеса̀ а҆поллѡ́нїєва, подви́жесѧ мы́слїю, и҆ и҆збра̀ де́сѧть ты́сѧщъ мѹже́й, и҆ и҆зы́де и҆з̾ ї҆ер҇ли́ма, и҆ сни́десѧ съ ни́мъ сі́мѡнъ бра́тъ є҆гѡ̀ въ по́мощь є҆мѹ̀.

75 И҆ ѡ҆полчи́сѧ на ї҆ѻппі́ю, и҆ застѹпи́ша є҆мѹ̀ ѿ гра́да, ѩ҆́кѡ стра́жа а҆поллѡ́нїева въ ї҆ѻппі́и бы́сть, и҆ ра́товаша ю҆̀.

76 И҆ ѹ҆боѧ́вшесѧ ѿверзо́ша и҆̀же и҆з̾ гра́да, и҆ ѡ҆блада̀ ї҆ѡнаѳа́нъ ї҆ѻппі́ею.

77 И҆ слы́ша а҆поллѡ́нїй, и҆ собра̀ трѝ ты́сѧщы кѡ́нникъ и҆ си́лѹ ве́лїю, и҆ и҆́де во а҆зѡ́тъ а҆́ки пѹтьше́ствѹѧ, и҆ а҆́бїе и҆зы́де на по́ле, занѐ и҆мѣ́ѧше мно́жество кѡ́нникъ и҆ надѣ́ѧшесѧ на ни́хъ.

78 И҆ гна̀ ї҆ѡнаѳа́нъ в̾слѣ́дъ є҆гѡ̀ во а҆зѡ́тъ, и҆ срази́шасѧ полцы̀ на ра́ть.

79 И҆ ѡ҆ста́ви а҆поллѡ́нїй ты́сѧщѹ кѡ́нникъ созадѝ и҆́хъ въ та́йнѣ.

80 И҆ позна̀ ї҆ѡнаѳа́нъ, ѩ҆́кѡ є҆́сть заса́да созадѝ є҆гѡ̀. и҆ ѡ҆крѹжи́ша по́лкъ є҆гѡ̀ и҆ стрѣлѧ́хѹ на лю́ди ѿ ѹ҆́тра да́же до ве́чера,

81 лю́дїе же стоѧ́ша, ѩ҆́коже заповѣ́да ї҆ѡнаѳа́нъ: и҆ ѹ҆трѹди́шасѧ ко́ни и҆́хъ.

82 И҆ приведѐ сі́мѡнъ си́лѹ свою̀ и҆ нападѐ на по́лкъ: кѡ́нницы бо ѹ҆трѹжде́ни бѧ́хѹ, и҆ сокрѹши́шасѧ ѿ негѡ̀ и҆ побѣго́ша,

83 и҆ кѡ́нницы расточи́шасѧ по по́лю и҆ бѣго́ша во а҆зѡ́тъ, и҆ внидо́ша въ виѳдагѡ́нъ ка́пище є҆гѡ̀, є҆́же ѹ҆цѣлѣ́ти.

84 И҆ пожжѐ ї҆ѡнаѳа́нъ а҆зѡ́тъ и҆ гра́ды и҆̀же бѣ́хѹ ѡ҆́крестъ є҆гѡ̀, и҆ взѧ̀ коры҄сти и҆́хъ и҆ ка́пище дагѡ́ново, и҆ вбѣ́гшихъ въ нѐ пожжѐ ѻ҆гне́мъ.

85 И҆ бы́сть па́дшихъ мече́мъ съ сожже́ными ѩ҆́кѡ ѻ҆́смь ты́сѧщъ мѹже́й.

86 И҆ ѿи́де ѿтѹ́дѹ ї҆ѡнаѳа́нъ и҆ прїи́де во а҆скалѡ́нъ, и҆ и҆зыдо́ша ѿ гра́да во срѣ́тенїе є҆мѹ̀ въ сла́вѣ вели́цѣй.

87 И҆ возврати́сѧ ї҆ѡнаѳа́нъ во ї҆ер҇ли́мъ съ сѹ́щими съ ни́мъ, и҆мѹ́ще коры҄сти мнѡ́ги.

88 И҆ бы́сть є҆гда̀ ѹ҆слы́ша а҆леѯа́ндръ ца́рь словеса̀ сїѧ҄, и҆ приложѝ просла́вити ї҆ѡнаѳа́на:

89 и҆ посла̀ є҆мѹ̀ гри́внѹ златѹ́ю ѩ҆́коже ѡ҆бы́чай є҆́сть даѧ́ти сро́дникѡмъ царє́вымъ, и҆ дадѐ є҆мѹ̀ а҆ккарѡ́нъ и҆ всѧ҄ предѣ́лы є҆гѡ̀ во ѡ҆держа́нїе.

<< ← Prev Top Next → >>