1 Въ коне́цъ, ѱало́мъ дв҃дѹ,
2 Доко́лѣ, гд҇и, забѹ́деши мѧ̀ до конца̀; доко́лѣ ѿвраща́еши лицѐ твоѐ ѿ менє̀;
3 Доко́лѣ положѹ̀ совѣ́ты въ дѹшѝ мое́й, бѡлѣ́зни въ се́рдцы мое́мъ де́нь и҆ но́щь; доко́лѣ вознесе́тсѧ вра́гъ мо́й на мѧ̀;
4 При́зри, ѹ҆слы́ши мѧ̀, гд҇и бж҃е мо́й: просвѣтѝ ѻ҆́чи моѝ, да не когда̀ ѹ҆снѹ̀ въ сме́рть:
5 да не когда̀ рече́тъ вра́гъ мо́й: ѹ҆крѣпи́хсѧ на него̀.
6 Стѹжа́ющїи мѝ возра́дѹютсѧ, а҆́ще подви́жѹсѧ.
7 А҆́зъ же на мл҇ть твою̀ ѹ҆пова́хъ: возра́дѹетсѧ се́рдце моѐ ѡ҆ сп҇нїи твое́мъ: воспою̀ гд҇еви бл҃годѣ́ѧвшемѹ мнѣ̀ и҆ пою̀ и҆́мени гд҇а вы́шнѧгѡ. |