1 И҆ бы́сть є҆гда̀ нача́ша человѣ́цы мно́зи быва́ти на землѝ, и҆ дщє́ри роди́шасѧ и҆̀мъ:
2 ви́дѣвше же сы́нове бж҃їи дщє́ри человѣ҄чи, ѩ҆́кѡ добры҄ сѹ́ть, поѧ́ша себѣ̀ жєны̀ ѿ всѣ́хъ, ѩ҆̀же и҆збра́ша.
Sons of God Marry Daughters of Men 3 И҆ речѐ гдⷭь бг҃ъ: не и҆́мать дх҃ъ мо́й пребыва́ти въ человѣ́цѣхъ си́хъ во вѣ́къ, занѐ сѹ́ть пло́ть: бѹ́дѹтъ же дні́е и҆́хъ лѣ́тъ сто̀ два́десѧть.
4 И҆споли́ни же бѧ́хѹ на землѝ во дни҄ ѡ҆́ны: и҆ пото́мъ, є҆гда̀ вхожда́хѹ сы́нове бж҃їи къ дще́ремъ человѣ́чєскимъ, и҆ ражда́хѹ себѣ̀: ті́и бѧ́хѹ и҆споли́ни, и҆̀же ѿ вѣ́ка, человѣ́цы и҆мени́тїи.
5 Ви́дѣвъ же гдⷭь бг҃ъ, ѩ҆́кѡ ѹ҆мно́жишасѧ ѕлѡ́бы человѣ́кѡвъ на землѝ: и҆ всѧ́къ помышлѧ́етъ въ се́рдцы свое́мъ прилѣ́жнѡ на ѕла҄ѧ во всѧ҄ дни҄:
6 и҆ помы́сли бг҃ъ, ѩ҆́кѡ сотворѝ человѣ́ка на землѝ, и҆ размы́сли.
7 И҆ речѐ бг҃ъ: потреблю̀ человѣ́ка, є҆го́же сотвори́хъ, ѿ лица̀ землѝ, ѿ человѣ́ка да́же до скота̀, и҆ ѿ га҄дъ да́же до пти́цъ небе́сныхъ: занѐ размы́слихъ, ѩ҆́кѡ сотвори́хъ ѧ҆̀.
8 Нѡ́е же ѡ҆брѣ́те блгдть пред̾ гдⷭемъ бг҃омъ.
9 Сїѧ҄ же бытїѧ҄ нѡ́єва: нѡ́е человѣ́къ првднъ, соверше́нъ сы́й въ ро́дѣ свое́мъ, бг҃ѹ ѹ҆годѝ нѡ́е.
10 Роди́ же нѡ́е трѝ сы́ны, си́ма, ха́ма, ї҆а́феѳа.
11 Растлѣ́сѧ же землѧ̀ пред̾ бг҃омъ, и҆ напо́лнисѧ землѧ̀ непра́вды.
12 И҆ ви́дѣ гдⷭь бг҃ъ зе́млю, и҆ бѣ̀ растлѣ́нна: ѩ҆́кѡ растлѝ всѧ́ка пло́ть пѹ́ть сво́й на землѝ.
13 И҆ речѐ гдⷭь бг҃ъ нѡ́ю: вре́мѧ всѧ́кагѡ человѣ́ка прїи́де пред̾ мѧ̀, ѩ҆́кѡ и҆спо́лнисѧ землѧ̀ непра́вды ѿ ни́хъ: и҆ сѐ, а҆́зъ погѹблю̀ и҆̀хъ и҆ зе́млю.
14 Сотворѝ ѹ҆̀бо себѣ̀ ковче́гъ ѿ дре́въ (негнїю́щихъ) четвероѹго́лныхъ: гнѣ́зда сотвори́ши въ ковче́зѣ, и҆ посмоли́ши є҆го̀ внѹтрьѹ́дѹ и҆ внѣѹ́дѹ смоло́ю.
15 И҆ та́кѡ сотвори́ши ковче́гъ: тре́хъ сѡ́тъ лакте́й долгота̀ ковче́га, и҆ пѧти́десѧти лакте́й широта̀, и҆ три́десѧти лакте́й высота̀ є҆гѡ̀.
16 Собира́ѧ сво́домъ сотвори́ши ковче́гъ, и҆ въ ла́коть сверши́ши є҆го̀ свы́ше: две́рь же ковче́га сотвори́ши ѿ страны̀: ѡ҆бита҄лища двокрѡ́вна и҆ трекрѡ́вна сотвори́ши въ не́мъ.
Noah Builds the Ark 17 А҆́зъ же, сѐ, наведѹ̀ пото́пъ, во́дѹ на зе́млю, погѹби́ти всѧ́кѹ пло́ть, въ не́йже є҆́сть дѹ́хъ жи́зни под̾ небесе́мъ: и҆ є҆ли҄ка сѹ́ть на землѝ, сконча́ютсѧ.
18 И҆ поста́влю завѣ́тъ мо́й съ тобо́ю: вни́деши же въ ковче́гъ ты̀ и҆ сы́нове твоѝ, и҆ жена̀ твоѧ̀ и҆ жєны̀ сынѡ́въ твои́хъ съ тобо́ю.
19 И҆ ѿ всѣ́хъ скотѡ́въ и҆ ѿ всѣ́хъ га҄дъ, и҆ ѿ всѣ́хъ ѕвѣре́й, и҆ ѿ всѧ́кїѧ пло́ти, два̀ два̀ ѿ всѣ́хъ введе́ши въ ковче́гъ, да пита́еши съ собо́ю: мѹ́жескїй по́лъ и҆ же́нскїй бѹ́дѹтъ.
20 Ѿ всѣ́хъ пти́цъ перна́тыхъ по ро́дѹ, и҆ ѿ всѣ́хъ скотѡ́въ по ро́дѹ, и҆ ѿ всѣ́хъ гадѡ́въ по́лзающихъ по землѝ по ро́дѹ и҆́хъ, два̀ два̀ ѿ всѣ́хъ вни́дѹтъ къ тебѣ̀, пита́тисѧ съ тобо́ю, мѹ́жескїй по́лъ и҆ же́нскїй.
21 Ты́ же возмѝ себѣ̀ ѿ всѣ́хъ бра́шенъ, ѩ҆̀же и҆́мате ѩ҆́сти, и҆ собере́ши къ себѣ̀, и҆ бѹ́дѹтъ тебѣ̀ и҆ ѡ҆́нымъ бра́шно.
22 И҆ сотворѝ нѡ́е всѧ҄ є҆ли҄ка заповѣ́да є҆мѹ̀ гдⷭь бг҃ъ, та́кѡ сотворѝ. |