1 Тогда̀ ста́нетъ во дерзнове́нїи мно́зѣ првдникъ пред̾ лице́мъ ѡ҆скорби́вшихъ є҆го̀ и҆ ѿмета́ющихъ трѹды̀ є҆гѡ̀:
2 ви́дѧщїи смѧтѹ́тсѧ стра́хомъ тѧ́жкимъ и҆ ѹ҆жа́снѹтсѧ ѡ҆ пресла́внѣмъ спасе́нїи є҆гѡ̀,
3 и҆ рекѹ́тъ въ себѣ̀ ка́ющесѧ и҆ въ тѣснотѣ̀ дѹ́ха воздыха́юще: се́й бѣ̀, є҆го́же и҆мѣ́хомъ нѣ́когда въ посмѣ́хъ и҆ въ при́тчѹ поноше́нїѧ.
4 Безѹ́мнїи, житїѐ є҆гѡ̀ вмѣни́хомъ неи́стово и҆ кончи́нѹ є҆гѡ̀ безче́стнѹ:
5 ка́кѡ вмѣни́сѧ въ сн҃ѣ́хъ бж҃їихъ, и҆ во ст҃ы́хъ жре́бїй є҆гѡ̀ є҆́сть;
6 ?И҆́бо заблѹди́хомъ ѿ пѹтѝ и҆́стиннагѡ, и҆ пра́вды свѣ́тъ не ѡ҆блиста̀ на́мъ, и҆ со́лнце не возсїѧ̀ на́мъ:
7 беззако́нныхъ и҆спо́лнихомсѧ сте́зь и҆ поги́бели и҆ ходи́хомъ въ пѹсты҄ни непроходи҄мыѧ, пѹти́ же гд҇нѧ не ѹ҆вѣ́дѣхомъ.
8 Что̀ по́льзова на́мъ горды́нѧ, и҆ бога́тство съ велича́нїемъ что̀ воздадѐ на́мъ;
9 Преидо́ша всѧ҄ ѡ҆́на ѩ҆́кѡ сѣ́нь и҆ ѩ҆́кѡ вѣ́сть претека́ющаѧ.
10 ѩ҆́кѡ кора́бль преходѧ́й волнѹ́ющѹюсѧ во́дѹ, є҆гѡ́же прохо́дѹ нѣ́сть стопы̀ ѡ҆брѣстѝ, нижѐ стезѝ ше́ствїѧ є҆гѡ̀ въ волна́хъ:
11 и҆лѝ ѩ҆́кѡ пти́цы, прелета́ющїѧ по а҆́ерѹ, ни є҆ди́но ѡ҆брѣта́етсѧ зна́менїе пѹтѝ, ѩ҆́звою же смѹща́ѧй бїе́мый дѹ́хъ ле́гкїй, и҆ разсѣца́емый си́лою шѹмѧ́щею движе́нїемъ кри́лъ прелетѣ̀, и҆ посе́мъ ни є҆ди́но зна́менїе ѡ҆брѣ́тесѧ прохо́дѹ въ не́мъ:
12 и҆лѝ ѩ҆́кѡ стрѣло́ю и҆спѹще́ною на намѣ́реное мѣ́сто разсѣ́ченный а҆́еръ внеза́пѹ въ себѣ̀ самѣ́мъ заключе́нъ бы́сть, ѩ҆́кѡ не позна́тисѧ прохо́дѹ є҆ѧ̀:
13 та́кѡ и҆ мы̀ рожде́ни ѡ҆скѹдѣ́хомъ и҆ добродѣ́тели ѹ҆́бѡ ни є҆ди́нагѡ зна́менїѧ мо́жемъ показа́ти, во ѕло́бѣ же на́шей сконча́хомсѧ.
14 И҆́бо ѹ҆пова́нїе нечести́вагѡ, ѩ҆́кѡ пра́хъ ѿ вѣ́тра под̾е́млемый и҆ ѩ҆́кѡ пѣ́на мѧ́гка ѿ бѹ́ри расто́ргнена, и҆ ѩ҆́кѡ ды́мъ ѿ вѣ́тра разлива́етсѧ и҆ ѩ҆́кѡ па́мѧть прише́лца є҆ди́нагѡ днѐ пре́йде:
15 првдницы же во вѣ́ки живѹ́тъ, и҆ во гдѣ̀ мзда̀ и҆́хъ, и҆ попече́нїе и҆́хъ ѹ҆ вы́шнѧгѡ:
16 сегѡ̀ ра́ди прїи́мѹтъ цр҇твїе благолѣ́пїѧ и҆ вѣне́цъ добро́ты ѿ рѹкѝ гд҇ни, ѩ҆́кѡ десни́цею покры́етъ и҆̀хъ и҆ мы́шцею защи́титъ и҆̀хъ.
17 Прїи́метъ всеѻрѹ́жїе рве́нїе своѐ и҆ воѡрѹжи́тъ тва́рь въ ме́сть врагѡ́мъ,
18 ѡ҆блече́тсѧ въ брѡнѧ̀ пра́вды и҆ возложи́тъ шле́мъ сѹ́дъ нелицемѣ́ренъ,
19 прїи́метъ щи́тъ непобѣди́мый преподо́бїе,
20 поѡстри́тъ же напра́сный гнѣ́въ во ѻ҆рѹ́жїе: спобо́ретъ же съ ни́мъ мі́ръ на безѹ҄мныѧ.
21 По́йдѹтъ праволѹ҄чныѧ стрѣ́лы мѡ́лнїины, и҆ ѩ҆́кѡ ѿ благокрѹ́гла лѹ́ка ѡ҆блакѡ́въ на намѣ́ренїе полетѧ́тъ:
22 и҆ ѿ каменоме́тныѧ ѩ҆́рости и҆спо́лнь падѹ́тъ гра́ды: вознегодѹ́етъ на ни́хъ вода̀ морска́ѧ, рѣ́ки же потопѧ́тъ на́глѡ:
23 сопроти́въ ста́нетъ и҆̀мъ дѹ́хъ си́лы, и҆ ѩ҆́кѡ ви́хоръ развѣ́етъ и҆̀хъ:
24 и҆ ѡ҆пѹстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. |