1 Мл҃тва ї҆еремі́и про҇ро́ка. Помѧнѝ, гд҇и, что̀ бы́сть на́мъ: при́зри и҆ ви́ждь ѹ҆кори́знѹ на́шѹ:
2 достоѧ́нїе на́ше ѡ҆брати́сѧ къ чѹжди҄мъ и҆ до́мы на́шѧ ко и҆ноплеме́нникѡмъ:
3 си́ри бы́хомъ, нѣ́сть ѻ҆тца̀, ма́тєри на́шѧ ѩ҆́кѡ вдѡвы̀.
4 Во́дѹ на́шѹ за сребро̀ пи́хомъ, дрова̀ на҄ша за цѣ́нѹ кѹпова́хомъ:
5 на вы҄ѧ на́шѧ гони́ми бы́хомъ, трѹди́хомсѧ, не почи́хомъ.
6 Е҆гѵ́петъ дадѐ рѹ́кѹ, а҆ссѹ́ръ въ насыще́нїе и҆́хъ.
7 Ѻ҆тцы̀ на́ши согрѣши́ша, и҆ нѣ́сть и҆́хъ, мы́ же беззакѡ́нїѧ и҆́хъ под̾ѧ́хомъ.
8 Рабѝ ѡ҆блада́ша на́ми, и҆збавлѧ́ющагѡ нѣ́сть ѿ рѹкѹ̀ и҆́хъ.
9 Въ дѹша́хъ на́шихъ носи́хомъ хлѣ́бъ на́шъ, ѿ лица̀ меча̀ въ пѹсты́ни.
10 Ко́жа на́ша а҆́ки пе́щь ѡ҆бгорѣ̀, разсѣдо́шасѧ ѿ лица̀ бѹ́рей гла́да.
11 Же́нъ въ сїѡ́нѣ смири́ша, дѣви́цъ во градѣ́хъ ї҆ѹ́диныхъ.
12 Кнѧ҄зи въ рѹка́хъ и҆́хъ повѣ́шени бы́ша, старѣ҄йшины не просла́вишасѧ.
13 И҆збра́ннїи пла́чь под̾ѧ́ша, и҆ ю҆́нѡши въ кла́дѣ и҆знемого́ша.
14 И҆ ста́рцы ѿ вра́тъ ѡ҆скѹдѣ́ша, и҆збра́ннїи ѿ пѣ́сней свои́хъ ѹ҆молко́ша.
15 Разсы́пасѧ ра́дость серде́цъ на́шихъ, ѡ҆брати́сѧ въ пла́чь ли́къ на́шъ,
16 спадѐ вѣне́цъ со главы̀ на́шеѧ: го́ре на́мъ, ѩ҆́кѡ согрѣши́хомъ.
17 Ѡ҆ се́мъ смѹти́сѧ се́рдце на́ше, ѡ҆ се́мъ поме́ркнѹша ѻ҆́чи на́ши.
18 На горѣ̀ сїѡ́нѣ, ѩ҆́кѡ поги́бе, лиси҄цы ходи́ша.
19 Ты́ же, гд҇и, во вѣ́ки всели́шисѧ, пр҇то́лъ тво́й въ ро́дъ и҆ ро́дъ.
20 Вскѹ́ю во вѣ́ки забыва́еши на́съ, ѡ҆ста́виши ли на́съ въ продолже́нїе дні́й;
21 Ѡ҆брати́ ны, гд҇и, къ тебѣ̀, и҆ ѡ҆брати́мсѧ, и҆ возновѝ дни҄ на́шѧ ѩ҆́коже пре́жде.
22 ѩ҆́кѡ ѿрѣва́ѧ ѿри́нѹлъ є҆сѝ на́съ, разгнѣ́валсѧ є҆сѝ на ны̀ ѕѣлѡ̀. |